ຂອບໃຈສື່ອອນລາຍ ແລະສາວງາມໃຈດີຜູ້ປິດທອງຫຼັງພະ

ຂອບໃຈສື່ອອນລາຍ ແລະສາວງາມໃຈດີຜູ້ປິດທອງຫຼັງພະ

16th June 2021 0 By Education

ສິ່ງດີໆທີ່ມີກັບສັງຄົມອອນລາຍກໍ່ຄືນ້ຳໃຈທີ່ມີໃຫ້ກັນ, ຜູ້ມີຊ່ວຍແບ່ງເບົາຄວາມທຸກໂສກຂອງຜູ້ທຸກຍາກໃຫ້ສາມາດມືນຕາອ້າປາກໄດ້ ບູຮານວ່າຄົນດີຕົກນ້ຳບໍ່ໄຫຼຕົກໄຟບໍ່ໄໝ້ ຄວາມໝາຍແປນໆກໍ່ຄືຄົນດີໆຍ່ອມມີຜູ້ຊົດຊ່ວຍບໍໄດ້ໂຊກຮ້າຍຕະຫຼອດໄປຄືກັບນ້ອງບົ້ງກືຄົນນີ້.

ກ່ອນໜ້ານີ້ບໍ່ດົນ ໄດ້ມີເລື່ອງລາວສຸດທີ່ໜ້າເວທະນາຂອງເດັກຍິງຄົນໜຶ່ງ ທີ່ຊີວິດສຸດລໍາບາກ ແມ່ຕາຍປະ ເຫຼືອພຽງພໍ່ຕາບອດທີ່ຕ້ອງລ້ຽງດູ ເບິ່ງແຍງ ທັ້ງທີນ້ອງຫາກໍ່ອາຍຸ 11ປີ ແຕ່ຕ້ອງກາຍມາເປັນເສົາຫຼັກເບິ່ງແຍງພໍ່ ຍິ່ງໄປກວ່ານັ້ນ ນ້ອງບໍ່ມີໂອກາດໄດ້ຮຽນໜັງສື ເພາະຄອບຄົວທຸກຈົນຫຼາຍ.

ຂໍ້ມູນຈາກໂຊຊຽວໃຫ້ຮູ້ວ່າ: ນ້ອງບົ້ງກື ອາຍຸ 11 ປີ ລ້ຽງພໍ່ຕາບອດ ນ້ອງບໍ່ໄດ້ຮຽນຫນັງສື, ນ້ອງບໍ່ມີຊີວິດ ແລະອະນາຄົດ ທີ່ສວຍງາມຄືຄົນອື່ນ, ນ້ອງບໍ່ມີໃຜ ອະນາຄົດເຕັມໄປດວ້ຍຄວາມມືດມົນ, ນ້ອງນອນ ກັບພໍ່ຕາບອດ ທຸກຄືນ ໃນມູ້ງຂາດໆດາງເກົ່າໆ ຊື່ງບາງຄືນ ສອງພໍ່ລູກ ກໍ່ບໍ່ວິດ ການເປັນ ອາຫານຂອງຍຸງ.

ຫຼັງຈາກເລື່ອງນີ້ຖືກໂພສລົງໃນສື່ອອນລາຍ ກໍ່ມີຄົນຈຳນວນຫຼາຍນຳເອົາເຂົ້າສານອາຫານແຫ້ງ, ເຄື່ອງໃຊ້ທີ່ຈຳເປັນໄປຊ່ວຍ ເຊິ່ງປະກົດວ່າ ເຮືອນຂອງນ້ອງກໍເປັນກະຕູບເກົ່າໆເຮັດໃຫ້ຜູ້ໄປພົບເຫັນອົດຄິດບໍ່ໄດ້ເຖິງຄວາມປອດໄພ, ສາວໄໝ ແມ່ຄ້າອອນລາຍຜູ້ນ້ຳໃຈງາມຈິ່ງອາສາເປັນຂົວຕໍ່ ແລະເປັນຫຼັກໃນການຊ່ວຍເຫຼືອປຸກເຮືອນຫຼັງໃໝ່ໃຫ້ນ້ອງບົ້ງກື ແລະພໍ່.

ຈາກເຮືອນຫຼັງເກົ່າໆແອ້ມຝາກະແຕະ ຍາມຝົນກ້ອງຕະລ່າງເຕັມແຕ່ນ້ຳຕອນນີ້ກາຍເປັນເຮືອນຫຼັງງາມກໍ່ໂບກ ແລະທາສີຈົບເຈືອດ້ານໃນປູກາໂລງົດງາມໜ້າຢູ່ ທັງໝົດນີ້ລ້ວນມາຈາກກຳລັງແຮງ ແລະສັດທາຈາກຊາວໂຊຊຽວ ເຊິ່ງເປັນພຽງພີ່ນ້ອງຮ່ວມຊາດ ແຕ່ເພິ່ນຍິນດີຊ່ວຍຈາກໃຈ.

ເວົ້າມາຮອດນີ້ແອັດຢາກແນະນຳໃຫ້ຮູ້ຈັກຜູ້ເປັນຫົວຈັກຫຼັກແຫຼ່ງໃຫ້ເຮືອນນ້ອງບົ້ງກືສຳເລັດ ເຊື່ອວ່າຫຼາຍຄົນຄົງຈະເຫັນສາວງາມຄົນນີ້ຜ່ານເຟສບຸກຢ່າງຕໍ່ເນື່ອງມາ ໂດຍສະເພາະຫຼັງຂ່າວຄາວນ້ອງບົ້ງກືຕ້ອງດູແລພໍ່ທີ່ພິການໂດຍລຳພັງແຖມຢູ່ຢ່າງທຸກຍາກລຳບາກ ນາງໄໝ ເປັນຜູ້ໜຶ່ງທີ່ຢືນຢູ່ຄຽງຂ້າງຜູ້ຕົກທຸກໄດ້ຍາກ ເຖິງບໍ່ມີຫຍັງຫຼວງຫຼາຍກໍ່ເລີ່ມໃຫ້ຈາກສິ່ງນ້ອຍໆເປັນຕົ້ນຊື່ໄຂ່, ເຂົ້າແຈກໃຫ້ປະຊາຊົນ ແລະ ນັກສຶກສາ ຜູ້ທຸກຍາກຂາດເຂີນ  ທີ່ສຳຄັນກ່ອນນັ້ນແມ່ນຊ່ວຍລະດົມທຶນຈາກສັງຄົມ ແລະ ບວກທຶນໂຕເອງສ້າງເຮືອນໃຫ້ຜູ້ທຸກຍາກ ແລະ ເຫັນວ່າມີຄວາມຈຳເປັນ.

ໄໝເປັນຄົນໜຶ່ງທີ່ເຄີຍຜ່ານວິກິດຊີວິດມາຢ່າງໂຊກໂຊນ ຈາກພໍ່ແມ່ມີທຸລະກິດກາຍເປັນຕິດລົບຍ້ອນໜີສິນຕ່າງໆ ເຮັດໃຫ້ໄໝຕ້ອງດິ້ນຮົນສ້າງຕົນດ້ວຍສອງຝາມືເປົ່າຈາກລົບ 0 ສູ່ການມີຊີວິດທີ່ດີຂຶ້ນ ແລະໄດ້ຫຼາຍຢ່າງທີ່ໄຝ່ຝັນເອົາໄວ້ ທຸກວັນນີ້ໄໝຈິ່ງເລືອກທີ່ຈະຊ່ວຍຄົນໃນສິ່ງທີ່ຊ່ວຍໄດ້ ດີໃຈນຳນ້ອງບົ້ງກື ແລະພໍ່ທີ່ເລື່ອງລາວໄປຮອດຄົນຜູ້ມີນ້ຳໃຈຄືໄໝ ແມ່ຄ້າໃຈພະຄົນນີ້.


ໄໝບອກວ່າຍ້ອນຕົວເອງເຄີຍຜ່ານຈຸດລຳບາກມາແລ້ວເວລາເຫັນຄົນອື່ນລຳບາກຕົນຮູ້ສຶກດີ ແລະເຂົ້າໃຈເຖິງຄວາມຮູ້ສືກນັ້ນ ຕົນເອງຈີ່ງຢາກໄປແບ່ງເບົາຄວາມລຳບາກເພື່ອໃຫ້ກະເຈົ້າມີກຳລັງໃຈສູ້ຊີວີດ ແລະໄດ້ເຫັນເຖິງຄວາມມີນ້ຳໃຈຂອງສັງຄົມຄົນລາວປຸກລະດົມຄວາມດີ.

ແນ່ນອນຜົນທີ່ຕອບຮັບມັນຄືຄວາມສຸກທີ່ໄດ້ເຫັນຄົນທີ່ເຮົາຊ່ວຍມີຊີວີດທີ່ດີຂື້ນ ມັນໄດ້ຫຼາຍໆຢ່າງ ໄດ້ຄວາມດີໄດ້ບຸນຄຳອວຍພອນ ແລະຍັງເຮັດຊີວີດຈະເລີນກ້າວໜ້າ

ເຮືອນນ້ອງບົ້ງກື