ມີລູກຍາກບໍ່ແມ່ນບັນຫາອີກຕໍ່ໄປ ພາຍໃນລາວເຮົາມີປິ່ນປົວຄົບວົງຈອນແລ້ວ

ມີລູກຍາກບໍ່ແມ່ນບັນຫາອີກຕໍ່ໄປ ພາຍໃນລາວເຮົາມີປິ່ນປົວຄົບວົງຈອນແລ້ວ

28th June 2021 1 By Education

ຈາກສະພາບເສດຖະກິດທີ່ປ່ຽນໄປ ເຮັດໃຫ້ຄົນຈຳນວນບໍ່ໜ້ອຍຕ້ອງສືກສາຮ່ຳຮຽນດົນ ເມື່ອຈົບອອກມາກໍ່ສຸມໃສ່ໜ້າທີ່ວຽກງານ ເພື່ອຕັ້ງໂຕພໍຮູ້ສືກຕົວອີກທີຢາກເອົາລູກກໍຍາກເກີນລໍຖ້າຫຼາຍປີບໍມາຈັກເທື່ອ ບາງຄົນທີ່ຖານະພໍມີກໍເດີນທາງໄປປະເທດໃກ້ຄຽງ ເພື່ອເຮັດກິບ, ສີດນ້ຳເຊື້ອ ແລະ ວິທີການອື່ນໆ, ຫຼ້າສຸດນີ້ບໍລິສັດຈາກຈີນຈະໄດ້ຮ່ວມມືກັບໂຮງໝໍແມ່ ແລະເດັກເກີດໃໝ່ ເພື່ອປິ່ນປົວການມີລູກຢໍຍາກຄົບວົງຈອນ.

ນັ້ນກາຍເປັນຄວາມຫວັງໃໝ່ໃຫ້ກັບຫຼາຍຄູ່ສົມລົດທີ່ກຳລັງລໍຖ້າຜູ້ສືບທອດວົງຕະກຸນໄດ້ໄປປືກສາ ແລະມີໂຕນ້ອຍໆມາເຕີມເຕັມຊີວິດຄູ່ ແລະຄອບຄົວ ແບບບໍ່ຈຳເປັນຕ້ອງເສຍເງິນຈຳນວນຫຼາຍໃນການເດີນທາງໄປໄກອີກຕໍ່ໄປ.


ເພື່ອເປັນການຊ່ວຍເຫຼືອປັບປຸງວຽກງານການປິ່ນປົວດ້ວຍເຕັກນິກການແພດທັນສະໄຫມ ຕາມນະໂຍບາຍຂອງລັດຖະບານ ໃນໂຮງໝໍຂັ້ນຕ່າງໆ ໃນຂອບເຂດທົ່ວປະເທດ, ໂດຍສະເພາະ ໂຮງໝໍແມ່ ແລະ ເດັກເກີດໃໝ່ ໃຫ້ມີຄວາມພ້ອມທາງດ້ານພື້ນຖານໂຄງລ່າງ ໃຫ້ເປັນລະບົບຄົບຊຸດ, ເຄື່ອງຈັກ-ອຸປະກອນ, ເຕັກນິກ-ເຕັກໂນໂລຊີ ຕະຫຼອດຮອດການຮຽນ, ການສອນ, ການຖອດຖອນບົດຮຽນ ແລະ ປະສົບການ, ການບຳລຸງ-ກໍ່ສ້າງພະນັກງານຂອງໂຮງໝໍ ທາງດ້ານວິຊາການແພດ ການປິ່ນປົວມີລູກຍາກ ດ້ວຍເຕັກນິກ-ວິຊາການ ທີ່ທັນສະໄໝໃຫ້ນັບມື້ພັດທະນາຂື້ນ.

ດັ່ງນັ້ນ ໂຮງຫມໍແມ່ ແລະ ເດັກເກີດໃຫມ່ ແລະ ກຸ່ມບໍລິສັດ ອີໂປຊື(ກວາງໂຈ)ຈຳກັດ ຈຶ່ງໄດ້ເຮັດການຮ່ວມມືດ້ານເຕັກນິກການປິ່ນປົວມີລູກຍາກ ໃນໂຮງໝໍແມ່ ແລະ ເດັກເກີດໃໝ່ ກໍ່ຄືຮ່ວມກັບກະຊວງສາທາລະນະສຸກ ສປປ ລາວ ເພື່ອຄວາມເຂັ້ມແຂງດ້ານການໃຫ້ບໍລິການສຸຂະພາບແມ່ທີ່ມີລູກຍາກ.

ເຊີ່ງພິທີເຊັນສັນຍາການຮ່ວມມືມີຂຶ້ນໃນວັນທີ 25 ມິຖຸນາ 2021 ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ ລະຫວ່າງ ທ່ານ ດຣ ສີວັນໄຊ ຈັນທະວົງສັກ ຄະນະອຳນວຍການໂຮງໝໍແມ່ ແລະ ເດັກເກີດໃໝ່ ແລະ ທ່ານ ຢາງຊົງເມ ປະທານ ກຸ່ມບໍລິສັດ ອີໂປຊື(ກວາງໂຈ) ຈຳກັດ ແລະໃຫ້ກຽດເຂົ້າຮ່ວມເປັນສັກຂີພິຍານໂດຍ ທ່ານ ປອ. ດຣ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ພ້ອມດ້ວຍບັນດາຫົວໜ້າ/ຮອງຫົວໜ້າ ຫ້ອງການ, ຫົວໜ້າກົມ, ຜູ້ອໍານວຍການໂຮງໝໍ, ມະຫາວິທະຍາໄລ ວິທະຍາສາດ ສຸຂະພາບ, ສະມາຄົມປະສູດພະຍາດຍິງ, ຄູ່ຮ່ວມພັດທະນາ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທີ່ມາ: ສູນຂໍ້ມູນຂ່າວສານການແພດ