ໂຄວິດສາຍພັນເດວຕ້າ ບໍ່ມາຫຼິ້ນສ່ຽງສຸດແຜ່ໄວກວ່າທີ່ຄິດໄວ້

ໂຄວິດສາຍພັນເດວຕ້າ ບໍ່ມາຫຼິ້ນສ່ຽງສຸດແຜ່ໄວກວ່າທີ່ຄິດໄວ້

2nd July 2021 0 By Education

ທີ່ຜ່ານມາປີ 2020 ພວກເຮົາພໍ້ແຕ່ສາຍພັນດັ້ງເດີມ ມາຮອດເດືອນເມສາຍ້ອນການລັກເຂົ້າມາທ່ຽວຂອງຜູ້ມັກມ່ວນ ເຮັດໃຫ້ສາຍພັນອັງກິດແຜ່ລາມຢ່າງໄວວາໃນຊຸມຊົນນະຄອນຫຼວງວຽງຈັນ ແລະຂະຫຍາຍສູ່ຕ່າງແຂວງຢ່າງຫຼີກລຽງບໍໄດ້ ເຊິ່ງສັງຄົມຕື່ນຕົກໃຈບໍ່ໜ້ອຍ ຍ້ອນມີ 3 ຄົນເສຍຊີວິດແລ້ວ ທີ່ໜ້າເປັນຫ່ວງກວ່ານັ້ນຄືສາຍພັນເດວຕ້າ ຫຼື ສາຍພັນອິນເດຍ ຍິ່ງຂະຫຍາຍໄວກວ່າສາຍພັນອັງກິດອີກ ແລະກໍມາຮອດລາວຈົນໄດ້ໃນແຮງງານລາວທີ່ກັບມາຈາກປະເທດໄທ.

ເຊິ່ງໃນວັນທີ 30ມິຖຸນາຜ່ານມາ ໄດ້ກວດພົບຜູ້ຕິດເຊື້ອໂຄວິດ ສາຍພັນເດວຕ້າ ຈາກແຮງງານທີ່ກັບມາຈາກປະເທດໄທ 3 ຄົນຢູ່ແຂວງຈໍາປາສັກ. ນັ້ນຮຽກຮ້ອງໃຫ້ປະຊາຊົນລາວຕ້ອງມີສະຕິຫຼາຍຂຶ້ນໃນການໃຊ້ຊີວິດ ຄະນະສະເພາະກິດເອງຢ້ຳເຕືອນຕ້ອງໄດ້ເຂັ້ມງວດ ກວດກາ, ກັ່ນກອງ ທຸກຄົນທີ່ເດີນທາງເຂົ້າມາ ສປປ ລາວ ຕາມຈຸດຜ່ານແດນຕ່າງໆ ປ້ອງກັນບໍ່ໃຫ້ສາຍພັນເດວຕ້າ ເຂົ້າມາລະບາດໃນປະເທດ.

ທ່ານ ດຣ ນາງ ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ຖະແຫຼງຂ່າວ ປະຈໍາວັນທີ 1 ກໍລະກົດ 2021 ວ່າ: ໃນວັນທີ 30 ມິຖຸນາຜ່ານມາ ສປປ ລາວ ເຮົາ ໄດ້ມີການຢັ້ງຢືນພົບຜູ້ຕິດເຊື້ອພະຍາດໂຄວິດ-19 ສາຍພັນເດວຕ້າ 3ຄົນໃນແຮງງານລາວ ເຊິ່ງໄດ້ຮັບອະນຸຍາດຈາກຄະນະສະເພາະກິດເດີນທາງມາຈາກປະເທດໃກ້ຄຽງ ເຂົ້າມາທາງດ່ານແຂວງຈຳປາສັກ.

ສາຍພັນເດວຕ້າ ເປັນສາຍພັນທີ່ສາມາດແຜ່ເຊື້ອໄດ້ໄວກວ່າ ສາຍພັນອານຟ້າທີ່ລະບາດໃນປັດຈຸບັນ ເຊິ່ງເຊື້ອພະຍາດສາຍພັນສາຍພັນເດວຕ້າ ນີ້ກໍາລັງເປັນບັນຫາເຮັດໃຫ້ຫຼາຍປະເທດໃນທົ່ວໂລກ ປະສົບກັບສະພາບການລະບາດຮອບໃໝ່. ໃນໄລຍະຜ່ານມາສາຍພັນເດວຕ້າ ມີການແຜ່ລະບາດໃນ 92 ປະເທດທົ່ວໂລກ ເປັນສາຍເຫດເຮັດໃຫ້ມີການລາຍງານຈຳນວນຕົວເລກຜູ້ຕິດເຊື້ອ ແລະ ຜູ້ຕ້ອງຈາກໂລກນີ້ໄປເປັນຈຳນວນຫຼວງຫຼາຍທະວີຄູນຂຶ້ນໃນທົ່ວໂລກ ເປັນຕົ້ນແມ່ນທັງປະເທດອິນເດຍ ໄລຍະມີການບາດຮຸນແຮງໃນປະເທດ ແຕ່ລະມື້ມີລາຍງານກໍລະນີຕິດເຊື້ອໃໝ່ ເປັນຈຳນວນຫຼັກແສນ ແລະ ເອົາຊີວິດຫຼາຍພັນຄົນຕໍ່ມື້.

ສຳລັບບັນດາປະເທດໃກ້ຄຽງກັບ ສປປ ລາວ ກໍເຫັນວ່າຍັງມີການລະບາດອອກເປັນວົງກວ້າງໃນຊຸມຊົນ, ສະພາບການລະບາດໃນປະເທດ ບໍ່ມີທ່ານອຽງທີ່ຈະຫຼຸດລົງ ຍັງສືບຕໍ່ມີການລາຍງານຕິດເຊື້ອໃໝ່ໃນແຕ່ລະວັນເປັນຫຼັກພັນ ແລະ ສາຍພັນທີ່ກຳລັງມີການລະບາດໃນປະເທດໃກ້ຄຽງ ແມ່ນມີທັງອານຟ້າ, ເບຕາ ກາມາ ແລະ ເດວຕ້າ.

ເຊິ່ງເປັນພັນທີ່ມີຄວາມສາມາດແຜ່ເຊື້ອໄດ້ໄວກວ່າສາຍພັນດັ່ງເດີມ ແລະ ລັດຖະບານຂອງບາງປະເທດໃກ້ຄຽງທີ່ມີແຮງງານລາວໄປເຮັດວຽກກໍໄດ້ມີການປະກາດປິດບາງແຂວງທີ່ມີການລະບາດໜັກພາຍໃນປະເທດເປັນເວລາ 1 ເດືອນ ເພື່ອຈະໄດ້ປະຕິບັດມາດຕະການສະກັດກັ້ນ ແລະ ຄວບຄຸມພະຍາດໃຫ້ໄດ້ເຕັມສ່ວນ ເຮັດໃຫ້ບັນດາກຸ່ມແຮງງານທີ່ບໍ່ມີວຽກເຮັດກັບຄືນບ້ານເກີດເມືອງນອນ ເຊິ່ງນັ້ນກໍແມ່ນລວມທັງແຮງງານລາວຈຳນວນໜຶ່ງກໍຈະຕ້ອງກັບຄືນມາຖິ່ນຖານເຊັ່ນດຽວກັນ.

ທ່ານດຣ ນາງ ພອນປະເສີດ ໄຊຍະມຸງຄຸນ ໃຫ້ຮູ້ຕື່ມວ່າ: ອີງໃສ່ສະພາບທີ່ກ່າວມານັ້ນເຫັນວ່າ ສປປ ລາວ ແມ່ນມີສິ່ງທ້າທາຍທີ່ຈະມີແຮງງານຈຳນວນຫຼາຍ ກັບຈາກປະເທດໃກ້ຄຽງທີ່ມີການລະບາດຂອງເຊື້ອພະຍາດ ແລະ ມີຄວາມສ່ຽງສູງທີ່ອາດຈະເກີດມີການລະບາດຂອງພະຍາດໂຄວິດ-19 ສາຍພັນເດວຕ້າ ໃນປະເທດໂດຍການນໍາເຊື້ອພະຍາດເຂົ້າມາແລ້ວມາແຜ່ລະບາດໃນຊຸມຊົນ ເຊິ່ງຖ້າຫາກມີການລະບາດເກີດຂຶ້ນຈະເຮັດໃຫ້ການສະກັດກັ້ນ ແລະ ຄວບຄຸມ ພະຍາດສາຍພັນດັ່ງກ່າວ ພົບຄວາມຫຍຸ້ງຍາກທີ່ສຸດ ຫຼື ອາດຈະບໍ່ສາມາດຄວບຄຸມການລະບາດຂອງພະຍາດໄດ້ຄືກັບທີ່ຫຼາຍປະເທດໃນໂລກກຳລັງປະສົບກັບບັນຫາດັ່ງກ່າວ.

ຕໍ່ກັບສະພາບດັ່ງກ່າວທາງຄະນະສະເພາະກິດທຸກຂະແໜງການຂັ້ນສູນກາງ ແລະ ທ້ອງຖິ່ນໄດ້ເອົາໃຈໃສ່ຕິດຕາມໃກ້ຊີດ ແລະ ເຂັ້ມງວດໃນການກວດກາ, ກັ່ນກອງ ທຸກຄົນທີ່ເດີນທາງເຂົ້າມາ ສປປ ລາວ ຕາມຈຸດຜ່ານແດນຕ່າງໆໃນທົ່ວປະເທດ ໂດຍສະເພາະແມ່ນມາຈາກບັນດາປະເທດ ທີ່ກຳລັງມີການລະບາດຂອງ ພະຍາດສາຍພັນເດວຕ້າ ( ປະເທດໄທ, ຫວຽດນາມ, ມຽນມາ ແລະ ກໍາປູເຈຍ) ໂດຍຮັບປະກັນໃຫ້ທຸກຄົນທີ່ໄດ້ຮັບອະນຸຍາດຈາກຄະນະສະເພາະກິດເດີນທາງເຂົ້າມາ ສປປ ລາວ ຕ້ອງໄດ້ເກັບຕົວຕົວຢ່າງຊອກຫາເຊື້ອໂຄວິດ-19 ແລະ ຈໍາກັດບໍລິເວນຕາມກໍານົດເວລາ ແລະ ສະຖານທີ່ຄະນະສະເພາະກິດກໍານົດໄວ້ຢ່າງເຂັ້ມງວດ.

ສຳລັບການລັກລອບເຂົ້າມາຕາມຊາຍແດນແບບບໍ່ຖືກຕ້ອງນັ້ນ ແມ່ນໃຫ້ທຸກຄົນເປັນຫູເປັນຕາຊ່ວຍເຈົ້າໜ້າທີ່ ຖ້າພົບເຫັນຢູ່ຈຸດໃດໃຫ້ລາຍງານຕໍ່ເຈົ້າໜ້າທີ່ ແລະ ອຳນາດການປົກຄອງໂດຍທັນທີ ເພື່ອນຳເອົາຜູ້ກ່ຽວເຂົ້າມາສະຖານທີ່ຈຳກັດບໍລິເວນຕາມລະບຽບຫຼັກການ ແລະ ສຳລັບກໍລະນີຜູ້ທີ່ຢັ້ງຢືນຕິດເຊື້ອພະຍາດສາຍພັນເດວຕ້າໃນປະເທດນັ້ນ ກໍ່ຕ້ອງໄດ້ເອົາໃຈໃສ່ຕິດຕາມ ແລະ ປະຕິບັດມາດຕະການເຝົ້າລະວັງ ແລະ ຄຸ້ມຄອງກໍລະນີຕາມາດຕະການທີ່ວາງອອກຢ່າງເຂັ້ມງວດ ແລະ ຄົບຖ້ວນ.