ກຽມພ້ອມຮັບພາຍຸໝູນເຂດຮ້ອນ ກຳລັງມາແລ້ວ

ກຽມພ້ອມຮັບພາຍຸໝູນເຂດຮ້ອນ ກຳລັງມາແລ້ວ

6th July 2021 0 By Education

ໂອ້ຍສະຖານະການໂຄວິດຂາຍັງຫຼ່ອຍພໍແຮງລະ ຍັງຈະມາອີກພາຍຸເອີຍບໍສົງສານມະນຸດໂຕດຳໆແນ່ນໍ ຫຼ້າສຸດນີ້ອຸຕຸແຈ້ງເຕືອນພາຍຸເຂດຮ້ອນກຳລັງເຄື່ອນຕົວມາອີກແລ້ວ ວັນທີ 6-9 ກຽມໂຕກຽມໃຈ ສຳຄັນຢ່າໄປຢູ່ກ້ອງຕົ້ນໄມ້ໃຫຍ່ສ່ຽງຟ້າຜ່າເດີ້ທຸກຄົນ.

ຕາມການຄາດຄະເນສະພາບອາກາດໄລຍະ​ 6-9​ ກໍລະກົດນີ້​ ແມ່ນຈະມີຝົນຕົກໜັກ, ລົມພັດແຮງຢູ່ບາງທ້ອງຖິ່ນໃນແຕ່ລະພາກຂອງປະເທດເຮົາ ໃນບົດລາຍງານສະພາບອາກາດຂອງກົມອຸຕຸນິຍົມ ແລະ​ ອຸທົກກະສາດ​ ໃນໄລຍະວັນທີ 5 – 11 ກໍລະກົດ 2021​ ມີຄຳເຕືອນເຝົ້າລະວັງສະພາບອາກາດຮ້າຍແຮງໄລຍະວັນທີ 6 – 9 ກໍລະກົດ 2021 ເນື່ອງຈາກພາຍຸໝຸນເຂດຮ້ອນຈະເຄື່ອນທີ່ຜ່ານເກາະໄຮ່ໜຳ ແລະ ສືບຕໍ່ເຄື່ອນທີ່ຜ່ານພາກເໜືອ ຂອງ ສສ ຫວຽດນາມ ແລະ ຈະເຮັດໃຫ້ລົມມໍລະສຸມຕາເວັນຕົກສ່ຽງໃຕ້ ເພີ່ມກໍາລັງແຮງພັດປົກຄຸມທົ່ວທຸກພາກຂອງ ສປປ ລາວ.

ຊຶ່ງຕະຫຼອດໄລຍະເວລາດັ່ງກ່າວຈະເຮັດໃຫ້ມີຝົນຕົກຟ້າຮ້ອງຟ້າເຫຼື້ອມໃນລະດັບຄ່ອຍ ຫາ ປານກາງເປັນບໍລິເວນກວ້າງ ແລະ ຕົກໜັກພ້ອມມີລົມພັດແຮງຢູ່ບາງທ້ອງຖິ່ນໃນແຕ່ລະພາກ.

ດັ່ງນັ້ນ, ຈຶ່ງຂໍແຈ້ງເຕືອນເຖິງປະຊາຊົນທີ່ອາໄສຢູ່ເຂດດັ່ງກ່າວ ຈົ່ງມີສະຕິລະມັດລະວັງຕໍ່ສະພາບຝົນຕົກຟ້າຮ້ອງຟ້າເຫຼື້ອມທີ່ຈະເຮັດໃຫ້ມີ ນໍ້າຖ້ວມຊູ ແລະ ດິນເຈື່ອນ ເກີດຂຶ້ນໄດ້, ໃນເວລາຝົນຕົກຟ້າຮ້ອງຟ້າເຫຼື້ອມບໍ່ຄວນໄປຢູ່ກ້ອງຕົ້ນໄມ້ໃຫຍ່ ເພື່ອຫຼີກລ່ຽງຜົນກະທົບຈາກຟ້າຜ່າ.