ໂອກາດຂອງພີ່ນ້ອງລາວຢູ່ເມືອງໄທ ໃຜຈະກັບຄືນປະເທດຮີບຮ້ອນເດີ້

ໂອກາດຂອງພີ່ນ້ອງລາວຢູ່ເມືອງໄທ ໃຜຈະກັບຄືນປະເທດຮີບຮ້ອນເດີ້

14th July 2021 0 By Education

 

ຕອນນີ້ກົມຕຳຫຼວດກວດຄົນເຂົ້າ-ອອກເມືອງ ເປີດທາງຮັບເອົາພົນລະເມືອງລາວທຸກຄົນຢູ່ເມືອງໄທທີ່ມີຈຸດປະສົງຢາກກັບບ້ານເກີດເມືອງນອນແມ່ນສາມາດກັບໄດ້ ຂໍພຽງພິສູດໄດ້ວ່າແມ່ນພົນລະເມືອງລາວໂດຍແທ້ ຈະບໍ່ມີການປັບໃໝໃດໆ.

ຈາກສະພາບການລະບາດຂອງພະຍາດໂຄວິດ-19 ທີ່ນັບມື້ຫຼາຍຂຶ້ນ ໂດຍສະເພາະຢູ່ປະເທດໄທ ແລະພົນລະເມືອງລາວທີ່ໄປເຮັດວຽກ, ໄປຢູ່ນຳພີ່ນ້ອງ, ໄປວຽກສ່ວນຕົວກໍ່ຫຼາຍຄົນ ແລະຖືກໄລຍະທີ່ທຸກປະເທດປິດດ່ານ ການໄປມາບໍສະດວກ ເພື່ອຊ່ວຍເຫຼືອພົນລະເມືອງລາວເຫຼົ່ານັ້ນໃຫ້ໄດ້ກັບບ້ານເກີດເມືອງນອນຢ່າງປອດໄພ.

ຕອນນີ້ກົມຕຳຫຼວດກວດກາຄົນເຂົ້າ-ອອກເມືອງ ແມ່ນໃຫ້ເຈົ້າໜ້າທີ່ກ່ຽວຂ້ອງເອົາໃຈໃສ່ປະສານສົມທົບກັບດ່ານເຊິ່ງໜ້າ ເພື່ອຮັບເອົາ ແຮງງານລາວ ຫຼື ພົນລະເມືອງລາວ ທີ່ຕົກຄ້າງຢູ່ ຣາຊະອານາຈັກໄທໃນນັ້ນແມ່ນແຍກເປັນ 3 ກຸ່ມດັ່ງນີ້:

1. ແຮງງານລາວ ຫຼື ພົນລະເມືອງລາວ ທີ່ມີເອກະສານເດີນທາງຖືກຕ້ອງ, ຄົບຖ້ວນ ໃຫ້ຖືເອົາກົນໄກການປະສານສົມທົບກັບດ່ານເຊິ່ງໜ້າ ເພື່ອຮັບເອົາເຂົາເຈົ້າກັບຄືນ ສປປ ລາວ;
2. ການຮັບເອົາແຮງງານລາວ ຫຼື ພົນລະເມືອງລາວ ທີ່ເດີນທາງໄປ ຣາຊະອານາຈັກໄທ ແບບບໍ່ຖືກຕ້ອງ ແມ່ນໃຫ້ສຶກສາອົບຮົມ, ກ່າວເຕືອນ ແລະ ຫ້າມບໍ່ໃຫ້ມີການປັບໃໝ. ໂດຍຜູ້ທີ່ມີເອກະສານ ຫຼື ຂໍ້ມູນ ທີ່ສາມາດຢັ້ງຢືນວ່າເປັນພົນລະເມືອງລາວ ເຊັ່ນ: ບັດປະຈຳຕົວ, ສໍາມະໂນຄົວ ຫຼື ໜັງສືຢັ້ງຢືນອື່ນ ໃຫ້ປະຕິບັດ ຕາມກົນໄກການປະສານສົມທົບ ກັບດ້ານເຊິ່ງໜ້າ ເພື່ອຮັບເອົາເຂົາເຈົ້າກັບຄືນ ສປປ ລາວ.


ສ່ວນຜູ້ທີ່ບໍ່ມີເອກະສານ ຫຼື ຂໍ້ມູນ ທີ່ບໍ່ສາມາດຢັ້ງຢືນວ່າເປັນພົນລະເມືອງລາວ ໃຫ້ປະສານສົມທົບກັບດ່ານເຊິ່ງໜ້າເພື່ອເກັບກໍາຂໍ້ມູນ ເຊັ່ນ: ຊື່, ນາມສະກຸນ, ວັນເດືອນປີເກີດ, ທີ່ຢູ່ໃນ ສປປ ລາວ, ໄປເຮັດວຽກຫຍັງຢູ່ ໄທ, ເບີໂທພໍ່-ແມ່ ຫຼືຍາດພີ່ນ້ອງຢູ່ ລາວ ເພື່ອສັງລວມຂໍ້ມູນ ປະສານຫາພາກສ່ວນກ່ຽວຂ້ອງ ພິສູດວ່າເປັນພົນລະເມືອງລາວແທ້ ກ່ອນຈະອະນຸຍາດ ໃຫ້ເດີນທາງເຂົ້າ ສປປ ລາວ.

ການຮັບເອົາພົນລະເມືອງລາວ ຫຼື ແຮງງານລາວ ທຸກຄັ້ງຕ້ອງຮີບຮ້ອນປະສານສົມທົບກັບ ຄະນະສະເພາະກິດທ້ອງຖິ່ນນັ້ນ ເພື່ອພາຕົວພວກກ່ຽວ ໄປກວດຫາເຊື້ອ COVID-19 ແລະ ໄປຈໍາກັດບໍລິເວນ ຕາມສະຖານທີ່ ທີ່ກໍານົດໄວ້.