ດ່ວນ! ຈໍາປາສັກສັ່ງກວດຄືນເຊື້ອໂຄວິດ-19 ໃນສູນກັກຕົວທຸກຄົນບໍ່ເວັ້ນແຕ່ເຈົ້າໜ້າທີ່

ດ່ວນ! ຈໍາປາສັກສັ່ງກວດຄືນເຊື້ອໂຄວິດ-19 ໃນສູນກັກຕົວທຸກຄົນບໍ່ເວັ້ນແຕ່ເຈົ້າໜ້າທີ່

19th July 2021 0 By Education

ພາຍຫຼັງທີ່ໄດ້ມີການເກັບຕົວຢ່າງມາກວດໃນວັນທີ 17 ກໍລະກົດ 2021 ແລະວັນທີ 18 ໄດ້ຜົນກວດເປັນບວກໃນເຈົ້າໜ້າທີ່ສູນກັກກັນໃນແຂວງຈຳປາສັກ ຫຼ້າສຸດ ຄະນະສະເພາະກິດເພື່ອສະກັດກັ້ນ ແລະ ຄວບຄຸມການລະບາດຂອງພະຍາດໂຄວິດ-19 ຂັ້ນ ແຂວງ ໄດ້ອອກແຈ້ງການດ່ວນທີ່ສຸດເພື່ອເກັບຕົວຢ່າງກວດຫາເຊື້ອໂຄວິດ-19 ໃນສູນກັກກັນທຸກໆຄົນບໍ່ເວັ້ນແຕ່ເຈົ້າໜ້າທີ່ທີ່ຕິດຕາມກວດກາ ພ້ອມດຽວກັນສູນດັ່ງກ່າວແມ່ນໃຫ້ປິດຊົ່ວຄາວບໍຮັບຄົນໃໝ່ເຂົ້າ ຄົນໃນກໍ່ຫ້າມອອກຈົນກວ່າຈະຄົ້ນຫາຜູ້ຕິດເຊື້ອໄດ້ທັງໝົດ.

ໃນແຈ້ງການໄດ້ລະໄວ້ມີລາຍລະອຽດດັ່ງນີ້:
1. ສູນກັກກັນແຮງງານຈາກຕ່າງປະເທດສູນຫລັກ 21 (1) ແລະ ສູນຫລັກ 21 (2)
ຫ້າມບໍ່ໃຫ້ເຈົ້າຫນ້າທີ່ຄຸ້ມຄອງສູນ ແລະ ແຮງງານມີການເຄື່ອນຍ້າຍເຂົ້າ-ອອກສູນເລີ່ມແຕ່ວັນທີ 17 ກໍລະກົດ 2021 ຍົກເວັ້ນຜູ້ທີ່ໄດ້ຮັບອະນຸຍາດຈາກເຈົ້າຫນ້າທີ່ໆຮັບຜິດຊອບສູນ

ໃຫ້ເກັບຕົວຢ່າງເຈົ້າຫນ້າທີ່ ແລະ ແຮງງານທີ່ຢູ່ໃນສູນຫລັກ 21 (1) ແລະ ສູນຫລັກ 21 (2) ຄືນໃຫມ່ທັງຫມົດ ພ້ອມທັງການເກັບຕົວຢ່າງເພື່ອຕິດຕາມການຕິດເຊື້ອພະຍາດໂຄວິດ-19 ຖ້າກັກກັນຄົບກໍານົດເວລາ ແລະ ຜົນກວດເປັນລົບແມ່ນໃຫ້ຈັດສົ່ງອອກໄປກັກກັນຢູ່ສູນຂອງເມືອງຕື່ມອີກ 14 ວັນ.


ສໍາລັບເຈົ້າຫນ້າທີ່ ແລະ ແຮງງານຜູ້ທີ່ກວດພົບເຊື້ອພະຍາດໂຄວິດ-19 ໃນໄລຍະທີ່ຢູ່ໃນສູນແມ່ນໃຫ້ສົ່ງເຂົ້າສູນປິ່ນປົວພະຍາດໂຄວິດ-19 ຂອງແຂວງທີ່ກໍານົດໄວ້ ເພື່ອຕິດຕາມອາການ ແລະ ປິ່ນປົວຈົນຫາຍດີ.
ພາຍຫລັງທີ່ພະນັກງານ ແລະ ແຮງງານກັກກັນຄົບກໍານົດແລ້ວ ແລະ ກວດບໍ່ພົບເຊື້ອຫມົດທຸກຄົນ ແລ້ວໃຫ້ທໍາຄວາມສະອາດ ແລະ ສີດຢາຂ້າເຊື້ອໃນບໍລິເວນສູນຫລັກ 21(1) ແລະ ສູນຫລັກ 21(2) ກ່ອນຈຶ່ງໃຫ້ເຈົ້າຫນ້າທີ່ຄຸ້ມຄອງສູນ ແລະ ແຮງງານຊຸດໃຫມ່ເຂົ້າໄປປະຕິບັດຫນ້າທີ່.


2. ເຂດດ່ານສາກົນວັງເຕົ່າ:
ສໍາລັບເຈົ້າຫນ້າທີ່ທັງຫມົດຢູ່ດ່ານ: ໃຫ້ຈໍາກັດບໍລິເວນຢູ່ໃນເຂດດ່ານສາກົນວັງເຕົ່າໃຫ້ຄົບກໍານົດ 14 ວັນ ແລະ ມີການເກັບຕົວຢ່າງເພື່ອຊອກຫາເຊື້ອພະຍາດໂຄວິດ-19 ໃນແຕ່ລະໄລຍະຕາມມາດຕະການສາທາລະນະສຸກທີ່ວາງອອກ ຈົນກວ່າຈະມີມາດຕະການໃຫມ່ອອກມາເພີ່ມເຕີມ.
ສໍາລັບເຈົ້າຫນ້າທີ່ມີຄວາມຈໍາເປັນຈະຕ້ອງໄດ້ປະຕິບັດຫນ້າທີ່ຢູ່ເຂດດັ່ງກ່າວ ຈະຕ້ອງມີການຜັດປ່ຽນການປະຈໍາການແຕ່ຕ້ອງໃຫ້ປະຕິບັດມາດຕະການໃນການປ້ອງກັນການຕິດເຊື້ອຢ່າງເຂັ້ມງວດ.

ສໍາລັບລົດຂົນສົ່ງສິນຄ້າ: ໃຫ້ປະຕິບັດຕາມແຈ້ງການເພີ່ມເຕີມຂອງເຈົ້າແຂວງສະບັບເລກທີ04/ ຈຂ.ຈສລົງວັນທີ 23 ມັງກອນ 2021 ແລະ ບົດແນະນໍາເລກທີ 8485 ຂອງກະຊວງ ຍທຂ. ມອບໃຫ້ເຈົ້າຫນ້າທີ່ໆກ່ຽວຂ້ອງ ຮັບຜິດຊອບເອົາໃຈໃສ່ຕິດຕາມການເຂົ້າ-ອອກ ແລະ ການເຄື່ອນໄຫວໄປມາຂອງລົດຂົນສົ່ງສິນຄ້າໃຫ້ສອດຄ່ອງຕາມມາດຕະການຂອງຄະນະສະເພາະກິດທີ່ໄດ້ວາງອອກ.

ສໍາລັບແຮງງານຈາກຕ່າງປະເທດ: ທີ່ເດີນທາງເຂົ້າມາຜ່ານດ່ານແມ່ນຕ້ອງປະຕິບັດຕາມມາດຕະການທີ່ສາທາລະນະສຸກໄດ້ກໍານົດອອກຢ່າງເຂັ້ມງວດ.
ໃຫ້ເຮັດອະນາໄມ ແລະ ພົ່ນຢາຂ້າເຊື້ອຕາມສະຖານທີ່ເຮັດວຽກຂອງເຈົ້າຫນ້າທີ່ປະຈໍາດ່ານ ແລະ ບ່ອນ ພັກຂອງແຮງງານທີ່ເຂົ້າມາຈາກຕ່າງປະເທດທຸກວັນ ເພື່ອຫຼຸດຄວາມສ່ຽງຂອງການຕິດເຊື້ອພະຍາດໂຄວິດ-19.

ແຈ້ງການລະອຽດ

ໂຄວິດມາຊຸດນີ້ໂຫດຮ້າຍຫຼາຍ