ບໍລິສັດ “GMO-Z.com Lao” ພ້ອມໃຫ້ບໍລິການດ້ານເຄືອຂ່າຍອິນເຕີເນັດໃນລາວ

ບໍລິສັດ “GMO-Z.com Lao” ພ້ອມໃຫ້ບໍລິການດ້ານເຄືອຂ່າຍອິນເຕີເນັດໃນລາວ

13th December 2019 0 By Admin

ບໍລິສັດ GMO-Z.com Lao ຈຳກັດ ແມ່ນບໍລິສັດຮ່ວມທຶນລະຫວ່າງບໍລິສັັດ GMO Internet ແລະ ກຸ່ມບໍລິສັດ AMZ (AMZ Group) ຊຶ່ງໄດ້ມີພິທີເປີດໂຕ ແລະ ເລີ່ມດໍາເນີນທຸລະກິດຢ່າງເປັນທາງການໃນ ວັນທີ 19 ພະຈິກ 2019 ຜ່ານມາ ຢູ່ທີ່ ໂຮງແຮມ ຄຣາວ ພລາຊາ, ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ທ່ານ ບຸນສະເຫຼີມໄຊ ເຄນນາວົງ, ຮອງລັດຖະມົນຕີ ກະຊວງໄປສະນີ, ຄົມມະນາຄົມ ແລະ ການສື່ສານ, ທ່ານ Futoshi EBATA, ຜູ້ອຳນວຍການໃຫຍ່ ບໍລິສັດ GMO-Z.com Lao ຈຳກັດ ພ້ອມດ້ວຍບັນດາແຂກທີ່ຖືກເຊີນເຂົ້າຮ່ວມ.


GMO-Z.com Lao ຕັ້ງຢູ່ຊັ້ນ 6, ອາຄານໂຮງແຮມວຽງຈັນ ພລາຊາ, ບ້ານຫັດສະດີເໜືອ, ເມືອງຈັນທະບູລີ, ນະຄອນຫຼວງວຽງຈັນ ດ້ວຍທຶນຈົດທະບຽນ 2,4 ຕື້ກີບ ເປັນບໍລິສັດທໍາອິດທີ່ໃຫ້ບໍລິການດ້ານເຄືອຂ່າຍອິນເຕີເນັດແບບຄົບວົງຈອນໃນປະເທດລາວ ໂດຍການນໍາໃຊ້ຄວາມຮູ້ ແລະ ປະສົບການໃນການພັດທະນາການບໍລິການດ້ານເຄື່ອຂ່າຍອິນເຕີເນັດ ແລະ ດໍາເນີນທຸລະກິດໂດຍບໍລິສັດ GMO Internet Group ຊຶ່ງເປັນກຸ່ມບໍລິສັດອິນເຕີເນັດໃນປະເທດຍີ່ປຸ່ນທີ່ມີພະນັກງານຫຼາຍກວ່າ 6,000 ຄົນ, ລວມມີ 112 ບໍລິສັດ. ໂດຍບໍລິສັດ GMO Internet ຖືກລະບຸໄວ້ເປັນພາກສ່ວນທໍາອິດຂອງຕະຫຼາດຫຼັກຊັບຂອງໂຕກຽວ. GMO Internet Group ໃຫ້ບໍລິການດ້ານເຄືອຂ່າຍອິນເຕີເນັດຄົບວົງຈອນເຊັ່ນ: ເປັນຜູ້ໃຫ້ບໍລິການ (ISPs), ໂດເມນ, ຄລາວ, ໂຮສຕິ້ງ, Shopping carts, ຫຼັກຊັບ, ການຊໍາລະຕ່າງໆ ແລະ ບໍລິການອື່ນໆ ທີ່ສາມາດນໍາໃຊ້ໄດ້ຢ່າງປອດໄພ ແລະ ສະດວກສະບາຍ.


ອີກດ້ານໜຶ່ງ, ບໍລິສັດ AMZ Group ແມ່ນມຸ່ງໝັ້ນທີ່ຈະເປັນ “ບໍລິສັດ ການຄ້າ ອັັນດັບໜຶ່ງໃນປະເທດລາວ” ໂດຍ ມີ 5 ທຸລະກິດຫຼັກຄື: ອຸດສາຫະກໍາການຄ້າ ແລະ ເຄື່ອງອຸປະໂພກບໍລິໂພກ, ອະສັງຫາລິມະຊັບ, ສັນຍາເຊົ່າປະກັນໄພ ແລະ ການເງິນ, ເຕັກໂນໂລຊີ ແລະ ພະລັງງານ ແລະ ການກະສິກໍາ ໂດຍຫຼາຍທຸລະກິດໄດ້ຮັບການພັດທະນາຜ່ານການຮ່ວມທຶນກັບບໍລິສັດຊັ້ນນໍາລະດັບໂລກ. ນອກນັ້ນ, ຍັງໃຫ້ບໍລິການຢ່າງເຕັມຮູບແບບທາງດ້ານຂໍ້ມູນ, ການຕິດຕໍ່ສື່ສານ ແລະ ເງິນທຶນທີ່ຈໍາເປັນໃຫ້ແກ່ບໍລິສັດຕ່າງໆໃນອາຊຽນ ແລະ ຍັງມີການໃຫ້ບໍລິການເພີ່ມເຕີມທີ່ມີຄຸນຄ່າເຊັ່ນ: ດ້ານຂໍ້ມູນຂ່າວສານ, ການຂົນສົ່ງ, ພາສີ ແລະ ອື່ນໆ.


ໃນແຜນການດຳເນີນທຸລະກິດບໍລິສັດ GMO-Z LAO ແມ່ນເລີ່ມໃຫ້ບໍລິການ ຈົດທະບຽນໂດເມນ, ໂຮສຕິ້ງ, ຄລາວ, ອອກໃບຢັ້ງຢືນອີເລັກໂຕຣນິກ ແລະ ອອກແບບເວັບໄຊທ໌ ເພື່ອທີ່ຈະສະໜັບສະໜູນຄົນລາວ ແລະ ເງິນຕາຂອງລາວ ສໍາລັບການດໍາເນີນທຸລະກິດ ພ້ອມທັງໄດ້ວາງແຜນດ້ານການບໍລິການຕ່າງໆຂອງ GMO Internet Group ເພື່ອມາພັດທະນາບັນດາບໍລິການຕ່າງໆໃຫ້ແທດເໝາະກັບ ສປປ ລາວ ແລະ ເລີ່ມຕົ້ນທຸລະກິດເພື່ອຊ່ວຍເຫຼືອເຂົ້າໃນການໃຊ້ ICT ໃນ ສປປ ລາວ.

ທີ່ມາ:ໜັງສືພິມ ວິທະຍາສາດ ແລະ ການພັດທະນາ