ຍັງໜັກໜ່ວງ! ຕົວເລກຜູ້ຕິດເຊື້ອໂຄວິດ-19 ໃນລາວມື້ນີ້ 223ຄົນ ໃນນັ້ນ 3ຄົນແມ່ນຊຸມຊົນ

ຍັງໜັກໜ່ວງ! ຕົວເລກຜູ້ຕິດເຊື້ອໂຄວິດ-19 ໃນລາວມື້ນີ້ 223ຄົນ ໃນນັ້ນ 3ຄົນແມ່ນຊຸມຊົນ

23rd July 2021 0 By Education

ປັດຈຸບັນເຫັນວ່າ ການຕິດເຊື້ອພະຍາໂຄວິດ-19 ຢູ່ນະຄອນຫຼວງວຽງຈັນ ແລະ ແຂວງວຽງຈັນ ທີ່ເຄີຍມີການລະບາດໃນຊຸມຊົນ ແມ່ນຫຼຸດຜ່ອນລົງ ແຕ່ເຫັນວ່າເລີ່ມມີການລາຍງານຕົວເລກຜູ້ຕິດເຊື້ອໃນຊຸມຊົນຢູ່ແຂວງຈໍາປາສັກ ພ້ອມດຽວກັນຍັງມີລາຍງານການຕິດເຊື້ອໃນບຸກຄົນ ແລະ ແຮງງານທີ່ເດີນທາງເຂົ້າມາໃນ ສປປ ລາວໃນຫຼາຍແຂວງ ໂດຍສະເພາະແມ່ນໃນບັນດາແຂວງທີ່ມີຊາຍແດນຕິດກັບປະເທດເພື່ອນບ້ານທີ່ກໍາລັງມີກະລະບາດຂອງພະຍາດໂຄວິດ-19ໃນຊຸມຊົນ.


ທ່ານ ດຣ ນາງ ພອນປະເສີດ ໄຊມຸງຄຸນ ກ່າວວ່າ: ໃນວັນທີ 22 ກໍລະກົດ 2021 ມີລາຍງານຜູ້ຕິດເຊື້ອໃໝ່ຈໍານວນ 223ຄົນ ເຮັດໃຫ້ຕົວເລກຜູ້ຕິດເຊື້ອສະສົມໃນ ສປປ ລາວ ມາຮອດປັດຈຸບັນແມ່ນ 4.432 ຄົນ, ມີຜູ້ເສຍຊີວິດສະສົມ 5ຄົນ ແລະ ຍັງສືບຕໍ່ປິ່ນປົວ 1.735 ຄົນ.


ທັ້ງນີ້, ກໍລະນີຕິດເຊື້ອໃໝ່ທັງໝົດ ແມ່ນມີການຕິດເຊື້ອພາຍໃນແຂວງຈໍານວນ 3ຄົນ ຈາກແຂວງຈໍາປາສັກ 2 ຄົນ ແລະ ແຂວງຫຼວງນໍ້າທາ 1ຄົນ; ນອກນັ້ນແມ່ນການຕິດເຊື້ອໃນແຮງງານ ແລະ ຜູ້ທີ່ເດີນທາງເຂົ້າປະເທດແມ່ນມີຈໍານວນ 220 ຄົນ(ນະຄອນຫຼວງວຽງຈັນ 7ຄົນ, ບໍລິຄໍາໄຊ 6ຄົນ; ຄໍາມ່ວນ 1ຄົນ; ສະຫວັນນະເຂດ 117ຄົນ, ສາລະວັນ 34ຄົນ ແລະ ຈໍາປາສັກ 55ຄົນ). ເຊິ່ງໃນວັນທີ 22 ກໍລະກົດ 2021 ທົ່ວປະເທດ ໄດ້ເກັບຕົວຢ່າງມາກວດຊອກຫາເຊື້ອໂຄວິດ-19 ທັງໝົດ 1.754 ຕົວຢ່າງ ໃນນັ້ນ ກວດພົບຜູ້ຕິດເຊື້ອໃໝ່ 223ຄົນ.


ຂໍ້ມູນໂດຍຫຍໍ້ ກ່ຽວກັບກໍລະນີຄິດເຊື້ອໃໝ່ 223ຄົນ ມີດັ່ງນີ້: ສໍາລັບແຂວງຫຼວງນໍ້າທາ 1ຄົນ ແລະ ຈໍາປາສັກ 2ຄົນ( ແມ່ນເປັນຜູ້ສໍາຜັດໃກ້ຊິດກັບຜູ້ຕິດເຊື້ອໃນໄລຍະຜ່ານມາ); ສ່ວນຢູ່ນະຄອນຫຼວງວຽງຈັນ 7ຄົນ, ບໍລິຄໍາໄຊ 6ຄົນ, ຄໍາມ່ວນ 1ຄົນ, ສະຫວັນນະເຂດ 117ຄົນ, ສາລະວັນ 34ຄົນ ແລະ ຈໍາປາສັກ 55ຄົນ.

ທັ້ງວນີ້ ໃນຈໍານວນ 220ຄົນນີ້ ແມ່ນແຮງງານລາວທີ່ເດີນທາງກັບມາຈາກປະເທດໃກ້ຄຽງ ເຊິ່ງໄດ້ຮັບອະນຸຍາດຈາກຄະນະສະເພາະກິດເຂົ້າມາຖືກຕ້ອງຕາມລະບຽບຫຼັກການ, ໄດ້ເກັບຕົວຢ່າງ ແລະ ຈໍາກັດບໍລິເວນຢູ່ສູນຈໍາກັດບໍລິດວນຂອງແຂວງ ເມື່ອຜົນກວດເປັນບວກພວກກ່ຽວໄດ້ຖືກນໍາສົ່ງໄປປິ່ນປົວຢູ່ສະຖານທີ່ປິ່ນປົວທີ່ຖືກກໍານົດໄວ້.