ໄຂ່ແພງຂຶ້ນແມ່ນບໍ ຢ່າຕົກໃຈດຽວກໍ່ລົງແລ້ວ

ໄຂ່ແພງຂຶ້ນແມ່ນບໍ ຢ່າຕົກໃຈດຽວກໍ່ລົງແລ້ວ

30th July 2021 0 By Education

ເຂົ້າອາທິດນີ້ໄດ້ຍິນຄົນຈົ່ມແຕ່ໄຂ່ແພງ ກໍວ່າແລນໍໄຂ່ເປັນເມນູອາຫານຈານເດັດທີ່ທຸກຄົວເຮືອນຕ້ອງມີ ບໍຫຼາຍກໍ່ໜ້ອຍ ມັນງ່າຍຕໍ່ການປຸງແຕ່ງໃຊ້ເວລາສັ້ນທີ່ສຸດ ສຳລັບອາຫານດິບໆແດງໆ ແລ້ວເອົາມາແຕ່ງ ແຕ່ຫຼາຍຄົນຈົ່ມວ່າ ນະຄອນຫຼວງວຽງຈັນ ບາງບ່ອນຮອດໜ່ວຍ 2000 ກີບ ປາໂທ ສ່ວນຂາຍເປັນແຕະກໍຕົກແຕະລະ 30.000 ກ່າພັນ 26-28 ບໍໄດ້ຝັນເຫັນແລ້ວວ່າຊ້ານ!!!


ແຕ່ທ່ານ ນັນຕາ ສານຸວົງ ຮອງຫົວໜ້າພະແນກ ອຸດສາຫະກຳ ແລະ ການຄ້າ ນະຄອນຫລວງວຽງຈັນ ໄດ້ໃຫ້ສຳພາດຕໍ່ນັກຂ່າວ ສຳນັກຂ່າວສານປະເທດລາວ ໃນວັນທີ 28 ກໍລະກົດ 2021 ກ່ຽວກັບສະພາບການເໜັງຕີງຂອງລາຄາໄຂ່ໄກ່ ຢູ່ນະຄອນຫລວງວຽງຈັນວ່າ: ປັດຈຸບັນນີ້, ສະພາບການເໜັງຕີງຂອງລາຄາສິນຄ້າ ເຫັນວ່າມີການເພີ່ມຂຶ້ນປະມານ 1.000 ຫາ 2.000 ກີບ ຈາກລາຄາປົກ ກະຕິ ໂດຍສະເພາະລາຄາໄຂ່ໄກ່.

ອີງຕາມສະຖິຕິຂອງພະແນກກະສິກຳ ແລະ ປ່າໄມ້ ນະຄອນ ຫລວງວຽງຈັນ ໄດ້ລາຍງານວ່າ ຢູ່ນະຄອນຫລວງວຽງຈັນ ມີຟາມລ້ຽງໄກ່ພັນໄຂ່ທັງໝົດ 198 ຟາມ ສ່ວນໃຫຍ່ກໍເປັນຟາມຂອງຜູ້ປະກອບການຄົນລາວ ເປັນຜູ້ລົງທຶນ ແລະ ເປັນຜູ້ລ້ຽງ ແລະ ມີພຽງ 1 ຟາມເທົ່ານັ້ນທີ່ເປັນຂອງຕ່າງປະເທດ ກໍຄືຟາມລ້ຽງໄກ່ພັນໄຂ່ຂອງບໍລິສັດຊີພີ, ເຊິ່ງມີໄກ່ພັນໄຂ່ທັງໝົດ 866.115 ໂຕ (2 ແສນໂຕ ແມ່ນຂອງບໍລິສັດຊີພີ), ເຊິ່ງມື້ໜຶ່ງສາມາດຜະລິດໄຂ່ໄດ້ 6 ແສນກວ່າໜ່ວຍ ແລະ ໄດ້ສົ່ງອອກຂາຍຢູ່ພາຍໃນນະຄອນຫລວງວຽງຈັນ, ອີກສ່ວນໜຶ່ງແມ່ນໄດ້ສົ່ງອອກຕ່າງແຂວງ. ຄາດວ່າປະມານທ້າຍເດືອນກັນຍາ ຫລື 2-3 ເດືອນຂ້າງນີ້ ລາຄາໄຂ່ໄກ່ກໍຈະກັບຄືສູ່ສະພາບປົກກະຕິ.


ເນື່ອງຈາກວ່າປັດຈຸບັນ, ລາຄາໄຂ່ໄກ່ຕາມທ້ອງຕະຫລາດ ໄດ້ເປັນບັນຫາທີ່ພົ້ນເດັ່ນຢູ່ໃນສັງ ຄົມ ໂດຍສະເພາະລາຄາສູງຂຶ້ນ ເຊິ່ງນັບແຕ່ກາງເດືອນກໍລະກົດ ເປັນຕົ້ນມາ ລາຄາໄຂ່ໄກ່ ຂາຍຢູ່ໜ້າ ຟາມ 910 ກີບຕໍ່ 1 ໜ່ວຍ ຫລື 27.300 ກີບຕໍ່ 1 ແຕະ. ສຳລັບລາຄາສົ່ງຮອດຕະຫລາດ (ລາຄາຕົວຈິງ ໃນປັດຈຸບັນ) 29.000-30.000 ກີບຕໍ່ແຕະ. ສ່ວນລາຄາຂາຍຍ່ອຍ 32.000-34.000 ກີບຕໍ່ແຕະ ຫລື ຂາຍເປັນໜ່ວຍ 1.500 ກີບຕໍ່ໜ່ວຍ.

ສາເຫດທີ່ເຮັດໃຫ້ລາຄາໄຂ່ປັບຂຶ້ນ ແມ່ນມາຈາກ ລາຄາແນວພັນໄກ່ພັນໄຂ່ ແລະ ລາຄາອາຫານມີການເໜັງຕີງ ຕາມການເໜັງຕີງຂອງອັດຕາແລກປ່ຽນເງິນຕາ, ໂດຍສະເພາະຕະກຸນເງິນບາດ (ໄກ່ພັນໄຂ່ແມ່ນນຳເຂົ້າ 100%, ຫົວອາຫານນຳເຂົ້າປະມານ 20%, ສ່ວນປະສົມອາຫານ ແລະ ວັດຖຸດິບຈຳນວນໜຶ່ງກໍນຳເຂົ້າ), ຄ່າໄຟຟ້າ ແລະ ນ້ຳມັນເຊື້ອໄຟເພີ່ມຂຶ້ນ ເຮັດໃຫ້ຄ່າຂົນສົ່ງກໍເພີ່ມຂຶ້ນ ເຊັ່ນ: ໄກ່ແມ່ສາວໃນ 6 ເດືອນຕົ້ນປີ 2021 ລາຄາ 65.000 ກີບ/ໂຕ, ປັດຈຸບັນ 70.000 ກີບ/ໂຕ ແລະ ລາຄາອາຫານໄກ່ ມີການເໜັງຕີງຢ່າງຕໍ່ເນື່ອງຈາກ 96.000 ກີບ/ເປົາ ມາເປັນ 125.000-135.000 ກີບ/ເປົາ.

ນອກຈາກນີ້, ຄວາມຕ້ອງການບໍລິໂພກໄຂ່ໄກ່ຢູ່ນະຄອນຫລວງວຽງຈັນ, ຕ່າງແຂວງ ກໍມີຈຳນວນຫລາຍຂຶ້ນ ເຮັດໃຫ້ການຜະລິດໄຂ່ໄກ່ບໍ່ພຽງ ພໍກັບຄວາມຕ້ອງການຂອງຕະຫລາດ ແລະ ໃນໄລຍະນີ້ ອາກາດຮ້ອນອົບເອົ້າເຮັດໃຫ້ໄກ່ໄຂ່ໜ້ອຍລົງ ແລະ ຄາດວ່າປະມານທ້າຍເດືອນກັນຍາ ຫລື 2-3 ເດືອນຂ້າງນີ້ ລາຄາໄຂ່ໄກ່ກໍຈະກັບຄືສູ່ສະພາບປົກກະຕິ.

ຂ່າວຈາກ ຂປລ