ດີໃຈນໍາ! ປະຊາຊົນທຸກຍາກ 12ບ້ານໃນເມືອງຕະໂອ້ຍ ໄດ້ຮັບການຊ່ວຍເຫຼືອ

ດີໃຈນໍາ! ປະຊາຊົນທຸກຍາກ 12ບ້ານໃນເມືອງຕະໂອ້ຍ ໄດ້ຮັບການຊ່ວຍເຫຼືອ

28th February 2020 0 By Education

ໃນວັນທີ 11 ກຸມພາ 2020 ຜ່ານມາ, ຫ້ອງການກະສິກໍາ ແລະ ປ່າໄມ້ ເມືອງຕະໂອ້ຍ ໄດ້ຈັດກອງປະຊຸມປະເມີນຜົນການຈັດຕັ້ງປະຕິ ບັດໂຄງການປີ 2019 ແລະ ວາງແຜນທິດທາງປີ 2020 ເມືອງຕະໂອ້ຍ ໂດຍການເປັນປະທານຮ່ວມຂອງທ່ານ ປະສອນໄຊ ອິນສີຊຽງໃໝ່, ຮອງຜູ້ອຳນວຍການ ທລຍ, ທ່ານ ບຸນເນື້ອ ຫຼອງຄຳໄຕ ເຈົ້າເມືອງໆຕະໂອ້ຍ, ທ່ານ ກິພະຈັນ ໂພສາລີ, ຮອງຫົວໜ້າພະແນກກະສິກຳ ແລະ ປ່າໄມ້ ທັງເປັນຜູ້ປະສານງານ ທລຍ ແຂວງສາລະວັນ, ແລະ ການເຂົ້າຮ່ວມຂອງພະນັກງານຫຼັກແຫຼ່ງຈາກ ຫ້ອງການທີ່ກ່ຽວຂ້ອງອ້ອມຂ້າງເມືອງ, ພະນັກງານ ທລຍ ຂັ້ນແຂວງ, ເມືອງ ແລະ ກຸ່ມບ້ານ ເຂົ້າຮ່ວມຢ່າງພ້ອມພຽງ.

ທ່ານ ກິພະຈັນ ໂພສາລີ, ໄດ້ລາຍງານການຈັດຕັ້ງປະຕິບັດໂຄງການຍ່ອຍ ຮອບວຽນທີ 16 ປີ 2019 ວ່າ: ໂຄງການຍ່ອຍດັ່ງກ່າວ ມີທັງໝົດ 14 ໂຄງການ, ມີມູນຄ່າ 2,5 ຕື້ກວ່າກີບ, ໃນນັ້ນ ທຶນຊຸມຊົນປະກອບສ່ວນ 162 ລ້ານກວ່າກີບ. ບັນດາໂຄງການນີ້ ກວມເອົາຂົງເຂດສາທາລະນະສຸກ, ສືກສາທິການ ແລະ ກິລາ ຫຼາຍກວ່າໝູ່ ເປັນຕົ້ນແມ່ນ ການກໍ່ສ້າງນໍ້າບາດານ, ລະບົບນ້ຳລິນ, ການກໍ່ສ້າງ ແລະ ສ້ອມແປງໂຮງຮຽນ.

ໂຄງການຍ່ອຍຮອບວຽນທີ 16 ນີ້ ໄດ້ກວມເອົາ 12 ບ້ານທຸກຍາກຊົນເຜົ່າປະໂກະ, ກະຕາງ ແລະ ຕະໂອ້ຍ, ປະກອບມີພົນລະເມືອງທັງໝົດ 5.710 ຄົນ, ຍິງ 2.860 ຄົນ ເທົ່າກັບ 17.76% ຂອງພົນລະເມືອງທັງໝົດພາຍໃນເມືອງ.

ທົ່ວເມືອງເມືອງຕະໂອ້ຍ ມີປະຊາກອນທັງໝົດ 33.814 ຄົນ, ຍິງ 17.070 ຄົນ, ມີ 4 ຊົນເຜົ່າຄື: ເຜົ່າກະຕາງ ກວມ 27,5%, ເຜົ່າຕະໂອ້ຍ 41% ແລະ ປະໂກະ 27%, ລາວລຸ່ມ 4,5% ປະກອບມີ 5 ກຸ່ມບ້ານ, 56 ບ້ານ ມີເນື້ອທີ່ທັງໝົດ 251.025 ເຮັກຕາ ແລະ ເນື້ອທີ່ທຳການຜະລິດ 76.071 ເຮັກຕາ. ໃນໄລຍະຜ່ານມາ ເມືອງຕະໂອ້ຍ ໄດ້ຮັບການຊ່ວຍເຫຼືອຈາກ ທລຍ ທັງໝົດ 193 ໂຄງການ ມູນຄ່າ 28 ຕື້ກວ່າກີບ.