ໂອ້ຍນໍ້! ສັງທອງສັ່ງລັອກດາວດ່ວນ ຄົນໃນຫ້າມອອກ ຄົນນອກຫ້າມເຂົ້າ ຄຸມໂຄວິດ-19 ຫຼັງມີຜູ້ຕິດເຊື້ອຢູ່ສໍາພັນນາ

ໂອ້ຍນໍ້! ສັງທອງສັ່ງລັອກດາວດ່ວນ ຄົນໃນຫ້າມອອກ ຄົນນອກຫ້າມເຂົ້າ ຄຸມໂຄວິດ-19 ຫຼັງມີຜູ້ຕິດເຊື້ອຢູ່ສໍາພັນນາ

31st July 2021 0 By Entertain

ຄະນະສະເພາະກິດ​ ສັ່ງປິດການເຂົ້າ-ອອກ ຂອງປະຊາຊົນເມືອງສັງທອງ ຍ້ອນຜູ້ຕິດເຊື້ອພະຍາດໂຄວິດ​ໃຫມ່​ ມີການພົວພັນກັບຄົນຈຳນວນຫຼາຍ.

ຄະນະສະເພາະກິດຕ້ານ, ສະກັດກັ້ນ, ຄວບຄຸມ ແລະ ແກ້ໄຂ ພະຍາດໂຄວິດ-19 ເມືອງສັງທອງ,​ ນະຄອນຫຼວງວຽງຈັນ ແຈ້ງມາຍັງບັນດາທ່ານຊາບວ່າ: ປະຈຸບັນນີ້ຢູ່ບ້ານ ສຳພັນນາ ເມືອງສັງທອງ ໄດ້ມີກໍລະນີຜູ້ຕິດເຊື້ອພະຍາດໂຄວິດ-19 ເຊິ່ງແມ່ນບຸກຄົນທີ່ເດີນທາງມາຈາກປະເທດໄທ ຜ່ານດ່ານສາກົນຂົວມິດຕະພາບ ລາວ-ໄທ ແຫ່ງທີ 1​ ແລະ ໄດ້ກັກໂຕຢູ່ສູນຫຼັກ 27 ນະຄອນຫຼວງວຽງຈັນ ພາຍຫຼັງຄົບຕາມກຳນົດ 14 ວັນແລ້ວ ໄດ້ອອກຈາກສູນ ໃນວັນທີ​ 21 ກໍລະກົດ 2021.

ຕົກມາຮອດວັນທີ 24 ກໍລະກົດ 2021 ຜູ້ກ່ຽວມີອາການເຈັບຫົວ ແລະ ເປັນໄຂ້ ແຕ່ບໍ່ໄດ້ໄປກວດຫາເຊື້ອ, ມາຮອດວັນທີ 29 ກໍລະກົດ 2021 ຜູ້ກ່ຽວຈຶ່ງໄດ້ໄປກວດຫາເຊື້ອຢູ່ສູນຫ້ວຍຫົງ ແລະ ໄດ້ຮັບແຈ້ງຜົນກວດເປັນບວກ (ຕິດເຊື້ອ) ໂຄວິດ-19 ໃນວັນທີ 30 ກໍລະກົດ 2021.​ ດັ່ງນັ້ນ,​ ຄະນະສະເພາະກິດຂັ້ນເມືອງສັງທອງ ຈຶ່ງໄດ້ກຳນົດບ້ານ ສຳພັນນາ ແລະ ບ້ານແກ້ງໝໍ້ ເມືອງສັງທອງ ນະຄອນຫຼວງວຽງຈັນ ເປັນບ້ານເເດງ ພ້ອມທັງກຳນົດເມືອງສັງທອງ​ ເປັນເຂດທີ່ມີຄວາມສ່ຽງການແຜ່ລະບາດຂອງພະຍາດດັ່ງກ່າວ.​

ດັ່ງນັ້ນ ຄະນະສະເພາະກິດຈຶ່ງອອກມາດຕະການເຂັ້ມງວດເພື່ອຄວບຄຸມການລະບາດໂຄວິດ-19 ໃນເມືອງສັງທອງ ເຊິ່ງໜຶ່ງໃນນັ້ນແມ່ນມາດຕະການລັອກດາວ ທີ່ລະບຸໄວ້ໃນຂໍ້ 2 ຂອງແຈ້ງການດັ່ງກ່າວວ່າ:  ປິດການເຂົ້າ-ອອກ ຂອງປະຊາຊົນເມືອງສັງທອງ ທີ່ມີຄວາມສ່ຽງລະບາດພະຍາດໂຄວິດ-19 ນັບແຕ່ເວລາ 22:00​ ໂມງ ຂອງວັນທີ 30 ກໍລະກົດ 2021 ເປັນຕົ້ນໄປ ຈົນກວ່າຈະມີແຈ້ງການປ່ຽນແປງ.

ກໍລະນີມີຄວາມຈຳເປັນເດີ່ນທາງເຂົ້າ-ອອກ ຕ້ອງໄດ້ຮັບອະນຸຍາດຈາກອົງການປົກຄອງບ້ານ, ເມືອງ ແລະ ນະຄອນຫຼວງວຽງຈັນ ແຕ່ຕ້ອງໄດ້ຮັບວັກຊິນຄົບ 2 ເຂັມ; ສໍາລັບລົດບັນທຸກ, ລົດຂົນສົ່ງສິນຄ້າຈະໄປບໍລິການ ຈະຕ້ອງໄດ້ຮັບອະນຸຍາດຈາກຄະນະສະເພາະກິດຂັ້ນເມືອງ ແລະ ນະຄອນຫຼວງວຽງຈັນ ແຕ່ໂຊເຟີລົດຕ້ອງໄດ້ຮັບວັກຊິນຄົບ 2 ເຂັມ.

ນອກຈາກນີ້ກໍ່ໃຫ້ປິດການເຂົ້າ-ອອກ ແລະ ການນຳໃຊ້ເຮືອຫາງຍາວ ຂອງປະຊາຊົນບ້ານສຳພັນນາ ແລະ ບ້ານແກ້ງໝໍ້ ເມືອງສັງທອງ ນັບແຕ່ເວລາ 22:00 ໂມງ ຂອງວັນທີ 30 ກໍລະກົດ 2021 ເປັນຕົ້ນໄປ ຈົນກວ່າຈະມີແຈ້ງການປ່ຽນແປງ; ໃຫ້ປະຊາຊົນພາຍໃນບ້ານຈຳກັດຕົນເອງພາຍໃນເຮືອນ; ສຳລັບການໄປທຳການຜະລິດ​ (ຢູ່ຂອບເຂດບ້ານຂອງຕົນ) ແລະ ກໍລະນີມີຄວາມຈຳເປັນຕ້ອງໄດ້ອອກໄປຊື້ເຄື່ອງອຸປະໂພກ-ບໍລິໂພກທີ່ຈຳເປັນ, ຊື້ຢາປົວພະຍາດ, ໄປໂຮງໝໍ ແມ່ນອະນຸຍາດຄອບຄົວລະ 1 ຄົນ ແຕ່ຕ້ອງໄດ້ຮັບອະນຸຍາດຈາກອົງການປົກຄອງບ້ານ ແລະ ຄະນະສະເພາະກິດຂັ້ນເມືອງ.​