ສະຖິຕິໃໝ່ອີກແລ້ວ 354 ປະໂທ້ເອີຍປະເທດເຮົາ

ສະຖິຕິໃໝ່ອີກແລ້ວ 354 ປະໂທ້ເອີຍປະເທດເຮົາ

7th August 2021 0 By Education

ຕາມການການຖະແຫຼງຂ່າວ ຂອງ ຄະນະສະເພາະກິດ, ໃນຕອນເຊົ້າ ວັນທີ 7 ສິງຫາ 2021 ກ່ຽວກັບ ສະພາບການລະບາດຂອງພະຍາດ COVID-19 ຢູ່ ສປປ ລາວ ໃຫ້ຮູ້ວ່າ: ປະຈຸບັນເຫັນວ່າມີລາຍງານ ການຕິດເຊື້ອໃນແຮງງານ ແລະ ບຸກຄົນ ທີ່ເດີນທາງເຂົ້າປະເທດ ໃນແຕ່ລະວັນຈຳນວນເພີ້ມຂຶ້ນຫຼາຍ ໃນແຕ່ລະວັນ ໃນວັນທີ 7 ສິງຫາ 2011 ນີ້ ມີລາຍງານຜູ້ຕິດ ເຊື້ອໃໝ່ ຈຳນວນ 354 ຄົນ ເຮັດໃຫ້ຕົວເລກຜູ້ຕິດເຊື້ອສະສົມໃນ ສປປ ລາວ ຮອດປະຈຸບັນ ແມ່ນ 8.132 ຄົນ, ມີຈຳນວນ ເສຍຊີວິດສະສົມ 8 (ໃໝ່ 1 ແຂວງ ຈຳປາສັກ) ຍັງສືບຕໍ່ປິ່ນປົວ 3.946 ຄົນ.


ໃນມື້ວານນີ້ ທົ່ວປະເທດ ໄດ້ມີການເກັບຕົວຢ່າງມາກວດຊອກຫາເຊື້ອ COVID-19 ທັງໝົດ 3.884 ຕົວຢ່າງ, ໃນນັ້ນ ກວດພົບຜູ້ຕິດເຊື້ອໃໝ່ 354 ຄົນ ເຊິ່ງ ກໍລະນີຕິດເຊື້ອໃໝ່ທັງໝົດ ແມ່ນມີການ ຕິດເຊື້ອພາຍໃນແຂວງ ຈຳນວນ 27 ຄົນ ຄື: ບໍ່ແກ້ວ 13 ຄົນ, ແຂວງວຽງຈັນ 5 ຄົນ, ໄຊຍະບູລີ 5 ຄົນ ແລະ ຈຳປາສັກ 4 ຄົນ.

ສ່ວນ ອີກ 327 ຄົນ ແມ່ນການຕິດເຊື້ອໃນແຮງງານ ແລະ ຜູ້ທີ່ເດີນທາງເຂົ້າ ປະເທດ ຄື: ຈາກ ສະຫວັນນະເຂດ 153 ຄົນ, ຈໍາປາສັກ 70 ຄົນ, ຄໍາມ່ວນ 51 ຄົນ, ນະຄອນຫຼວງ 49 ຄົນ, ວຽງຈັນ 2 ຄົນ, ໄຊຍະບູລີ 1 ຄົນ ແລະ ບໍລິຄຳໄຊ 1 ຄົນ.

ຂ່າວໃຫ້ຮູ້ອີກວ່າ ໄລຍະນີ້ຍັງມີການເດີນທາງເຂົ້າມາ ສປປ ລາວຢ່າງຕໍ່ເນຶື່ອງ ຕາມຈຸດຜ່ານແດນ ວັນທີ 6 ສິງຫາ 2021 ມີຜູ້ເດີນທາງຜ່ານ ດ່ານເຂົ້າມາ ສປປ ລາວ ຈຳນວນ ທັງໝົດ 3.260 ຄົນ, ທຸກຄົນເດີນທາງເຂົ້າມາທັງໝົດ ແມ່ນໄດ້ ຖືກເກັບຕົວຢ່າງກວດຊອກຫາເຊື້ອພະຍາດໂຄວິດ-19 ແລະ ນໍາສົ່ງເຂົ້າໄປຈໍາກັດບໍລິເວນຢູ່ສູນ ຈໍາກັດບໍລິເວນ ຫຼືໂຮງແຮມຈຳກັດບໍລິເວນ ທີ່ຄະນະສະເພາະກິດກຳນົດໄວ້ຈົນຄົບ 14 ວັນ ຈຶ່ງຈະໄປເຄື່ອນໄຫວໄດ້, ຮອດປະຈຸບັນທົ່ວປະເທດມີສູນຈຳກັດບໍລິເວນທີ່ເປີດນຳໃຊ້ຢູ່ທັງໝົດ 79 ສູນ ແລະ 43 ໂຮງແຮມ, ມີຜູ້ຈຳກັດບໍລິເວນທັງໝົດ 14,114 ຄົນ.