ສາທາເຕືອນ ບຸກຄົນທີ່ໄປຕ່າງປະເທດໃຫ້ແຈ້ງຕາມຂໍ້ມູນຄວາມຈິງ ແລະ ໃຫ້ຄວາມຮ່ວມມື

ສາທາເຕືອນ ບຸກຄົນທີ່ໄປຕ່າງປະເທດໃຫ້ແຈ້ງຕາມຂໍ້ມູນຄວາມຈິງ ແລະ ໃຫ້ຄວາມຮ່ວມມື

29th February 2020 0 By Admin

CRI: ຕອນບ່າຍວັນທີ 27 ກຸມພາ 2020 ທີ່ກະຊວງສາທາລະນະສຸກ, ທ່ານ ດຣ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ໄດ້ຖະແຫຼງຂ່າວວ່າ: ໃນໄລຍະນີ້ ຫຼາຍປະເທດໃນໂລກມີການແຜ່ລະບາດຂອງເຊື້ອພະຍາດ COVID-19 ໂດຍສະເພາະປະເທດໄທ ປະເທດບ້ານໃກ້ເຮືອນຄຽງທີ່ກໍາລັງໜ້າເປັນຫ່ວງ ເຊິ່ງໃນຂະນະນີ້ ປະເທດໄທກໍາລັງມີຜູ້ຕິດເຊື້ອແຜ່ກະຈາຍໄປໃນວົງກວ້າງ ແລະມີຄົນທີ່ເປັນກຸ່ມສ່ຽງຈໍານວນຫຼວງຫຼາຍ ເນື່ອງມາຈາກມີຊາຍໄວອະວຸໂສ ຊາວໄທຄົນໜຶ່ງ ພ້ອມກັບພັນລະຍາ ໄດ້ເດີນທາງກັບມາຈາກຮອກໄກໂດ ປະເທດຍີ່ປຸ່ນ ໃນກາງເດືອນກຸມພາ ແລ້ວກັບມາປະເທດຕົນເອງ ແລະປາກົດວ່າເປັນໄຂ້ ແລະມີເຊື້ອໂຄວິດ19 ແຕ່ບໍ່ຍອມບອກເຈົ້າໜ້າທີ່ວ່າໄປຕ່າງປະເທດມາ.

ຍິ່ງໄປກວ່ານັ້ນ ຊາຍຄົນນີ້ ແລະພັນລະຍາຂອງລາວກັບມາຢູ່ເຮືອນ ກ່ອນເຂົ້າໄປກວດໃນໂຮງໝໍແຫ່ງໜຶ່ງ ອັນເຮັດໃຫ້ເຫດບານປາຍ ເຊິ່ງເຮັດໃຫ້ຄົນທີ່ພົວພັນ ແລະໃກ້ຊິດກັບພວກເຂົາຈໍານວນໜຶ່ງຕິດເຊື້ອ ແລະກາຍເປັນຄົນກຸ່ມສ່ຽງ ເຊັ່ນພະນັກງານໃນໂຮງໝໍແຫ່ງນັັັ້ນມີຜູ້ຕິດເຊື້ອ ແລະຖືກແຍກປ່ຽວຈໍານວນຫຼາຍຄົນ, ທະນາຄານແຫ່ງໜຶ່ງຖືກປິດ ເພາະລູກຊາຍຂອງພວກເຂົາເຮັດວຽກຢູ່ສະຖານທີ່ນັ້ນ; ຍິ່ງໄປກວ່ານີ້, ໂຮງຮຽນອີກແຫ່ງໜຶ່ງຖືກປິດ ເພາະຫຼານຊາຍຂອງຊາຍໄວອະວຸໂສຄົນນັ້ນ ເຂົ້າໂຮງຮຽນຢູ່ແຫ່ງດັ່ງກ່າວກໍ່ຕິດເຊື້ອນໍາກັນກັບລາວ.


ທ່ານ ດຣ. ຣັດຕະນະໄຊ ກ່າວຕື່ມວ່າ: ດ້ວຍເຫດຜົນນີ້ ກະຊວງສາທາລະນະສຸກ ຈຶ່ງໄດ້ແຈ້ງເຕືອນບຸກຄົນທີ່ໄປທ່ຽວຕ່າງປະເທດແລ້ວກັບເຂົ້າມາລາວ ເຊັ່ນເດີນທາງໄປເຂດທີ່ມີຄວາມສ່ຽງສູງເຊັ່ນ ສປ ຈີນ, ສ ເກົາຫຼີ, ຢີ່ປຸ່ນ ແລະປະເທດອື່ນໆ ທີ່ມີການລະບາດຂອງພະຍາດ COVID-19 ຄວນໃຫ້ຄວາມຮ່ວມມີໃນການແຈ້ງໜ່ວຍງານທີ່ກ່ຽວຂ້ອງຕາມຂໍ້ມູນຈິງທຸກປະການ ພ້ອມທັງຕິດຕາມອາການຂອງຕົນເອງຢູ່ໃນບ້ານ ແລະສໍາລັບບຸກຄົນໃດທີ່ມີອາການຄ້າຍຄືຕິດເຊື້ອ ຕາມນິຍາມທີ່ກະຊວງລະບຸໃນເບື້ອງຕົ້ນໃຫ້ໂທແຈ້ງສາຍດ່ວນ 166 ຕະຫຼອດ 24 ຊົ່ວໂມງໂດຍບໍ່ເສຍຄ່າບໍລິການ.

ດັ່ງນັ້ນ, ມາດຕະການເຫຼົ່ານີ້ ກໍ່ແມ່ນເພື່ອປ້ອງກັນຕົນເອງ, ຄອບຄົວ ແລະຄວາມຮັບຜິດຊອບຕໍ່ສັງຄົມ, ເພື່ອບໍ່ມຫ້ມີກໍລະນີຕິດເຊື້ອ ແລະບໍ່ໃຫ້ມີການລະບາດຂອງເຊື້ອພະຍາດ COVID-19 ໃນວົງກວ້າງ ດັ່ງບົດຮຽນຂອງປະເທດເພື່ອນບ້ານໄດ້ຮັບ. ນອກນັ້ນ ຖ້າບໍ່ມີຄວາມຈໍາເປັນໃນການເດີນທາງໄປປະເທດກຸ່ມສ່ຽງ ຄວນຫຼີກລ່ຽງການເດີນທາງໄວ້ກ່ອນໃນໄລຍະນີ້. ອີກອັນໜຶ່ງ ຖ້າຫາກບຸກຄົນໃດມີອາການໄຂ້, ໄອ, ຫຼືຈາມ ໃຫ້ໃສ່ຜ້າປິດປາກ ເພື່ອປ້ອງກັນບໍ່ໃຫ້ນ້ຳລາຍກະຈາຍອອກໄປໃນວົງກວ້າງ.

ບົດລາຍງານສະພາບການຫຼ້າສຸດ

.

.

.