ໂຄວິດໂຫດຮ້າຍເກີນ ກະທົບທັງຊີວິດ ແລະເສດຖະກິດ, ຄົນຂຶ້ນຍົນລາວເຫຼືອພຽງ 20-30%

ໂຄວິດໂຫດຮ້າຍເກີນ ກະທົບທັງຊີວິດ ແລະເສດຖະກິດ, ຄົນຂຶ້ນຍົນລາວເຫຼືອພຽງ 20-30%

1st March 2020 0 By Education

ປີນີ້ເສດຖະກິດທົ່ວໂລກໄດ້ຮັບຜົນກະທົບໜັກຈາກບັນຫາການລະບາດຂອງໄວຣັສສາຍພັນໃໝ່ ທຸກປະເທດມີການພົວພັນທາງເສດຖະກິດ-ສັງຄົມ ເມື່ອຄົນຢຸດທ່ຽວຢຸດຊັອບ ຫັນມາເກັບຕົວເສດຖະກິດຕົກຕ່ຳແນ່ນອນ, ຕອນນີ້ສາຍການບິນແຫ່ງຊາດຂອງລາວມີຄົນຂຶ້ນຍົນບໍ່ຮອດ 20-30% ຂອງຈຳນວນເຕັມທີ່ເຄີຍມີ ເມື່ອທຸລະກິດບໍ່ກຸ້ມທຶນການຢຸດບິນຄືເປັນທາງອອກທີ່ດີສຸດ!

ຕາມຂ່າວຫຼ້າສຸດຈາກທາງລັດວິສາຫະກິດ-ການບິນລາວໃຫ້ຮູ້ວ່າ: ເສັ້ນທາງການບິນໄປ ສປຈີນ ຈຳນວນ 09 ເສັ້ນ, ປັດຈຸບັນຍັງເຫລືອແຕ່ເສັ້ນທາງ ວຽງຈັນ-ເມືອງຊາງຊາ ທີ່ຍັງໃຫ້ບໍລິການຢູ່ແຕ່ເປັນການເຊົ່າເໝົາລໍາ ເພື່ອຂົນອຸປະກອນຊ່ວຍເຫລືອດ້ານການແພດ ແລະ ຜູ້ໂດຍສານຈໍານວນໜຶ່ງທີ່ຕົກຄ້າງຢູ່ລາວໄປຈີນ./


ຂະນະທີ່ເສັ້ນທາງການບິນຈາກ ສປປລາວ ຫາ ສ.ເກົາຫລີ ໄດ້ໃຫ້ບໍລິການເປັນຖ້ຽວບິນສຸດທ້າຍໃນວັນທີ 29 ກຸມພາ 2020 ທີ່ຜ່ານມານີ້ ແລະ ຕໍ່ມາໄດ້ຢຸດໃຫ້ບໍລິການຊົ່ວຄາວແລ້ວ, ສັງລວມມາຮອດປັດຈຸບັນ, ເສັ້ນທາງການບິນໄປຕ່າງປະເທດທີ່ການບິນລາວ ຍັງສືບຕໍ່ໃຫ້ບໍລິການຢູ່ ແມ່ນລວມມີ: ວຽງຈັນ-ບາງກອກ, ວຽງຈັນ-ຊຽງໃໝ່, ວຽງຈັນ-ຮ່າໂນ້ຍ, ວຽງຈັນ-ໂຮຈິມິນ ແລະ ວຽງຈັນ-ຊຽບລຽບ ເທົ່ານັ້ນ.

ແນວໃດກໍ່ຕາມ ໃນບັນດາເສັ້ນບິນທີ່ຍັງເປີດຢູ່ກໍ່ມີຈຳນວນຜູ້ໂດຍສານພຽງ 20-30% ຂອງຈໍານວນຜູ້ໂດຍສານທີ່ເຄີຍມີເທົ່ານັ້ນ ເຮັດໃຫ້ໃນຕໍ່ໜ້າອາດເປັນໄປໄດ້ທີ່ຕ້ອງຫລຸດຖ້ຽວບິນໄປປະເທດໃກ້ຄຽງນີ້ລົງອີກຖ້າຫາກຜູ້ໂດຍສານຍັງສືບຕໍ່ຫລຸດລົງ.

ສ່ວນສາຍການບິນພາຍໃນແມ່ນຍັງສືບຕໍ່ໃຫ້ບໍລິການເປັນປົກກະຕິ ແຕ່ຈໍານວນຜູ້ໂດຍສານໃນແຕ່ລະເສັ້ນທາງຫລຸດລົງຈໍານວນຫລາຍ ເມື່ອທຽບໃສ່ໄລຍະກ່ອນ, ການລະບາດຂອງພະຍາດ COVID-19 ສົ່ງຜົນກະທົບໂດຍກົງຕໍ່ລັດວິສາຫະກິດການບິນລາວ ຍ້ອນຈໍານວນຜູ້ໂດຍສານໂດຍລວມຫລຸດລົງປະມານ 50%, ເຮັດໃຫ້ລັດວິສາຫະກິດການບິນລາວ ຕ້ອງໄດ້ດໍາເນີນມາດຕະການປະຢັດຢ່າງເຂັ້ມງວດທີ່ສຸດ, ລາຍຈ່າຍໃດທີ່ບໍ່ຈໍາເປັນ ແລະ ຮີບດ່ວນແມ່ນໃຫ້ເລື່ອນອອກໄປກ່ອນ.

ພ້ອມນີ້ ໄດ້ລະດົມໃຫ້ພະນັກງານຈໍານວນໜຶ່ງທີ່ເຫລືອວຽກ ໂດຍສະເພາະພະນັກງານຈຸບິນຂອງສາຍການບິນທີ່ໄດ້ຢຸດໃຫ້ບໍລິການຊົ່ວຄາວສະໝັກໃຈພັກວຽກໄປກ່ອນໂດຍບໍ່ເອົາເງິນເດືອນ, ໃນຕໍ່ໜ້າຖ້າຫາກພະຍາດ COVID-19 ຍັງສືບຕໍ່ແຜ່ລະບາດເປັນເວລາດົນອາດມີການຕັດເງິນຕັດພະນັກງານສ່ວນໃດສ່ວນໜຶ່ງອີກເພື່ອຫລຸດຜ່ອນລາຍຈ່າຍລົງ, ນອກຈາກນີ້ ລັດວິສາຫະກິດການບິນລາວ ໄດ້ສະເໜີໃຫ້ລັດຖະບານແລ້ວເພື່ອຂໍທິດຊີ້ນໍາ ແລະ ຊ່ວຍແກ້ໄຂບັນຫາທີ່ເກີດຂຶ້ນຕາມຄວາມເໝາະສົມ.